ՀՀ մասնագիտական կրթության որակի ապահովման ազգային կենտրոնի (ՈԱԱԿ) նախաձեռնությամբ կազմակերպվեց հանդիպում բուհերի պրոռեկտորների հետ՝ քննարկելու բարձրագույն կրթության արդյունավետության ցուցիչների մշակման և կիրառման նոր մոտեցումները։ Քննարկման առանցքում էր այն գաղափարը, որ բուհերի պետական ֆինանսավորումը պետք է հիմնվի արդյունքների վրա՝ արտացոլելով կրթության որակի, կառավարման և ռազմավարական զարգացման իրական արդյունավետությունը։
ՈԱԱԿ-ի տնօրեն Ռուբեն Թոփչյանը նշեց, որ ՀՀ բարձրագույն կրթության և գիտության մասին նոր ընդունված օրենքը նախատեսում է բուհերի ֆինանսավորման կատարողականի արդյունքների ցուցանիշների (ԿԱՑ) վրա հիմնված մոտեցում։ Այս մոդելը, որը կիրառում են եվրոպական կրթական տարածքի առաջատար երկրները, հնարավորություն է ստեղծում կրթական համակարգը դարձնելու առավել թափանցիկ, հաշվետու և ռազմավարական նպատակներով կառավարվող։
Ռուբեն Թոփչյանը միաժամանակ շեշտեց, որ ԿԱՑ-ը պետք է նպաստի ոչ միայն տվյալների հավաքագրմանը, այլև ռազմավարական մտածողության ձևավորմանը բուհերում։ Այդ ցուցիչներով հնարավոր կլինի գնահատել կրթության արդյունքները, կառավարման գործընթացների արդյունավետությունը և բուհերի ներդրումը երկրի սոցիալ-տնտեսական զարգացման մեջ։
Կատարողականի արդյունքային ցուցանիշների մշակման աշխատանքներ իրականացվում են «Erasmus+» «KPI4HE» եռամյա ծրագրի շրջանակում, որի համակարգողն է Երևանի պետական համալսարանը։ Մշակված ցուցանիշներն առաջիկայում փորձարկվելու են ծրագրի շահակից բուհերում։ Հանդիպման նպատակն էր ծրագրի շրջանակում ընտրված ԿԱՑ-ի իրատեսականությունը և կիրառելիությունը քննարկել ավելի լայն մակարդակում՝ բոլոր բուհերի ներգրավմամբ, քանի որ ապագայում ԿԱՑ-ի համակարգը վերաբերվելու է բարձրագույն կրթության ամբողջ դաշտին։
ՈԱԱԿ-ի ինստիտուցիոնալ և ծրագրային փորձաքննության բաժնի մասնագետ Անահիտ Տերտերյանը ներկայացրեց տվյալների հավաքագրման այն վեց հիմնական ուղղությունները, որոնց վերաբերյալ «KPI4HE» ծրագրի շրջանակում շահակիցները պետք է տվյալներ հավաքագրեն, այն է՝ կադրային ներուժի ձևավորում, համագործակցությունների զարգացում, հավասար հնարավորությունների ապահովում, ուսումնական միջավայրի որակ, կառավարման արդյունավետություն, հետազոտություն և նորարարություն։ «KPI4HE» ծրագրի շրջանակում ներկայում իրականացվում է ԿԱՑ-ի փորձարկում երկու հիմնական ուղղություններով՝ կադրային ներուժի զարգացում և կառավարման արդյունավետություն, որոնք ընտրվել են՝ հիմք ընդունելով եվրոպական հաջողված մոդելները։
Քննարկման ընթացքում բարձրացվեցին նաև աշխատաշուկայի կարիքների քարտեզագրման, շրջանավարտների զբաղվածության, կրթական ծրագրերի արդիականացման և ուսանողների կարողությունների ձևավորման հետ կապված հարցեր։ Մասնակիցները կարևորեցին միասնական մեթոդաբանության մշակումը, որը թույլ կտա գնահատել բուհերի արդյունավետությունը:
Հավելենք՝ ԿԱՑ-ի մշակման գործընթացը պետք է դիտարկվի որպես կրթական համակարգի բարելավման գործիք, ոչ թե վարչական պարտավորություն։ Բուհերի ակտիվ մասնակցությունը, առաջարկությունների ներառումը և տվյալների բաց ու հիմնավորված վերլուծությունը կօգնեն ձևավորելու կայուն և արդարացված ֆինանսավորման համակարգ՝ ուղղված կրթության որակի բարձրացմանը և երկրի մարդկային կապիտալի հզորացմանը։